Producindo Planta

Lode é un dos principais productores de flores e plantas ornamentais en España e un dos primeiros en introducir e producir novas plantas en Galicia, xa que cando el veu para aquí, na nosa comunidade só había tres ou catro viveiros.

Lode é de orixe belga e veu a Galicia no ano 1981 para ver a costa galega. Pouco despois asentouse en Fisterra coa idea de montar unha empresa. Para escoller a zona baseouse no clima pois segundo el, Galicia na franxa costeira ten o mellor clima para cultivar ó aire libre sen necesidade de invernadoiros podendo obter así plantas a un mellor prezo.

A primeira idea que trouxo era a de cultivar rododendros dunha maneira rápida para levalos para Bélxica e vendelos alí, pero poucos anos despois, aí polo 1985 xa descartou esta idea e dedicouse só o mercado local, sobre todo en Galicia e norte de Portugal.

"Flores de Lires" que é así como se denomina a súa empresa comezou cunha superficie de 2000 metros cadrados e na actualidade xa ten sobre unhas dez hectáreas dedicadas a plantas e flores. Esta conta coas últimas tecnoloxías. A especie que máis está vendendo na actualidade é o Leptospernum (sobre unhas 60000 plantas ó ano). Tamén andan a traballar nunha nova línea, introducindo variedades que non hai no mercado.