Producindo Planta

Durante este curso realizamos unha serie de prácticas sobre a produción de planta. Unha delas foi a de esgallos. Neste post non vos vou falar dos esgallos en si, xa que podedes obter información detallada sobre eles se ides á sección de apuntes de clase que se atopa na marxe dereita deste blog (ó igual que de outros moitos temas interesantes sobre a produción de planta), pero si vos quero ensinar unhas fotos que realicei durante o transcurso da práctica. Nelas poderedes observar como traballamos en grupo e a forma en que realizamos o enchido das bandexas con diferentes tipos de substratos e mesturas distes (area, turba e perlita), e tamén a fase de realización dos esgallos e de introdución nos diferentes substratos. Os esgallos recibiron dous tipos de tratamentos: con hormonas de enraizamento en po e tamén en forma líquida. Unha parte dos esgallos deixámolos sen ningún tratamento para poder comprobar, non só a diferenza de enraizamento entre os distintos tipos de substratos, senón tamén entre os que levaban ou non hormonas de enraizamento. Despois de rematar deixamos a zona de traballo limpa e ordenada, factores moi importantes á hora de traballar e que deben estar sempre presentes.

Aínda que fago eu este post, gustaríame tamén mencionar a todos os meus compañeiros de clase que dunha ou doutra forma axudaron á súa realización.