Producindo Planta

Os temporais de vento e neve que sufriu ultimamente Galicia produciu graves danos nalgunhas plantas.
O vento pode provocar derribo de árbores, rotura de ramas, portes raquíticos e deformacións e follaxe pobre nas copas. Acentúa o efecto das baixas temperaturas e da seca. O aire, se procede do mar, pode producir queimaduras nas follas xa que a sal acumulada é fitotóxica.

As consecuencias negativas da neve poden ser roturas por acumulación, morte das plantas por non aguantar as baixas temperaturas, pode ralentizarse e incluso paralizarse por completo a floración e tamén poden favorecer a aparición de enfermidades xa que algúns fungos atopan o seu óptimo de desenrolo nestas condicións. Pero a neve pode ocasionar algúns efectos vantaxosos como protexer ás plantas contra as xeadas e, ó derreterse e converterse en auga líquida, aumenta o nivel de auga dispoñible para as plantas e abranda a terra axudando desta forma a que algunhas sementes se desenrolen mellor.

Outro factor climático que nos afecta aínda agora son as xeadas. Estas producen cristais de xeo nas células dos tecidos vexetais o que lles ocasiona feridas similares a queimaduras. As continuas xeadas e desxeos pode ocasionar gretas nos troncos e nas ramas. A morte por desecación é outro dos problemas que se producen xa que se despois dunha noite de xeada aparece un día soleado a planta transpira excesivamente e en ocasións non dispón de auga dabondo no solo para compensar a deshidratación, por atoparse xeada.